കഴുതകൾ

നിന്നെനോക്കി ഒരു കണ്ണു ചിമ്മുന്നവൻ 
ഒരു കുഷ്ട രോഗിയാണ്.
ശരീരത്തിൽ അല്ല 
അവന്റെ ഉള്ളിൽ പുഴുത്തു വിങ്ങുന്ന 
പുണ്ണിന്റെ ദണ്ഡത്താൽ
ആ കണ്ണ്‌ അടഞ്ഞതാണെന്നു
കരുതിക്കൊള്ളൂ.
യാത്രയ്ക്കിടയിൽ നിന്റെ സ്വകാര്യതകളിൽ
കൈകടത്തുന്നവനു നേരെ നീ കാറിത്തുപ്പുക.
വിജനവീഥികളിൽ തിരക്കുണ്ടാക്കുന്നവനോടും ,
ശ്രദ്ധാപൂർവമായ അശ്രദ്ധയോടെ
നിന്നെ തട്ടിക്കടന്നു പോകുന്നവനോടും 
നീ അതു തന്നെ ചെയ്യുക.
നിന്നെ തുറിച്ചു നോക്കുന്നവനിൽ നിന്നും ,
ചിരിക്കാൻ ബദ്ധപ്പെടുന്നവനിൽ നിന്നും
നീ അവജ്ഞയോടെ മുഖം തിരിക്കുക.
ഒളിഞ്ഞും മറഞ്ഞും നിന്നെ നോക്കി
വെള്ളമിറക്കുന്നവനെയും ,
അശ്ലീലം പറയുന്നവനെയും
നീ തീർത്തും അവഗണിച്ചേക്കുക.
കഴുത കാമം കരഞ്ഞു തീർക്കുമെന്ന്
നീ കേട്ടിട്ടില്ലേ..?!!